ວຽງຈັນໂລຊິດສະຕິດພາກ ບັນລຸຫຼາຍຂໍ້ຕົກລົງເປີດກວ້າງການຮ່ວມມື ໂດຍນໍາໃຊ້ຂໍ້ໄດ້ປຽບດ້ານພູມມີສາດຂອງ ທ່າບົກທ່ານາແລ້ງເປັນສູນກາງເຊື່ອມໂຍງພາກພື້ນ ແລະ ສາກົນດ້ານການຂົນສົ່ງ, ຮ່ວມກັນສ້າງເວທີການບໍລິການ ສິນຄ້າຂ້າມແດນ ແລະ ການບໍລິການທາງດ້ານແຫຼ່ງທຶນແບບປະສົມປະສານ-ພັດທະນາການຄ້າຂ້າມແດນໃນພາກພື້ນ

ລະຫວ່າງວັນທີ 19-24 ມິຖຸນາ 2025 ນີ້ ບໍລິສັດ ວຽງຈັນໂລຊິດສະຕິດພາກ ໄດ້ເຂົ້າຮ່ວມງານວາງສະແດງສິນຄ້າຈີນ-ອາຊີຕາເວັນອອກສຽງໃຕ້ (China-South Asia Expo) ຄັ້ງທີ 9 ທີ່ນະຄອນຄຸນໝິງ ສປ ຈີນ ນໍາພາຄະນະໃນການເດີນທາງໂດຍແມ່ນທ່ານ ວຽງຄອນ ສິດທິໄຊ ຮອງປະທານບໍລິສັດ ທ່າບົກ ທ່ານາແລ້ງ ຈໍາກັດຜູ້ດຽວ

ງານດັ່ງກ່າວຈັດຂຶ້ນພາຍໃຕ້ຈຸດປະສົງ ເພື່ອເປັນການເຊື່ອມໂຍງ ແລະ ພັດທະນາຜັນຂະຫຍາຍໂຄງການໜຶ່ງແລວ  ໜຶ່ງເສັ້ນທາງ ເຊື່ອມໂຍງຈີນສູ່ບັນດາປະເທດອາຊີ ແລະ ຍົກສູງຜັນຂະຫຍາຍດ້ານການຮ່ວມມືກັບບັນດາປະເທດທີ່ເຂົ້າຮ່ວມໂຄງການໜຶ່ງແລວໜຶ່ງເສັ້ນທາງ

ໃນໄລຍະເປີດງານ ພະນະທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະຮອງລັດຖະມົນຕີ, ຄະນະກົມ ຈາກກະຊວງທີ່ກ່ຽວຂ້ອງ ແລະ ຄະນະນຳຂອງປະເທດອາຊີຕາເວັນອອກສຽງໃຕ້ໄດ້ເຂົ້າຢ້ຽມຊົມຫ້ອງວາງສະແດງ ໂດຍມີ ທ່ານ ສາຄອນ ພິລາງາມ ຜູ້ອຳນວຍການ ທ່າບົກ ທ່ານາແລ້ງ ໄດ້ນໍາສະເໜີຄວາມສຳຄັນຂອງໂຄງການວຽງຈັນ ໂລຊິດສະຕິກພາກ ແລະ ໂຄງການທ່າບົກທ່ານາແລ້ງ ເຊິ່ງເປັນໂຄງການຍຸດຖະສາດຕາມວິໃສທັດຂອງລັດຖະບານລາວ ໃນການຫັນປ່ຽນ ສປປ ລາວ ຈາກປະເທດທີ່ບໍ່ມີທາງອອກສູ່ທະເລ ໃຫ້ການເປັນສູນກາງການເຊື່ອມໂຍງເຊື່ອມຈອດທາງບົກຂອງພາກພື້ນ ແລະ ສາກົນ ແລະ ໄດ້ລາຍງານຫຍໍ້ ກ່ຽວກັບການຜັນຂະຫຍາຍໂຄງຂ່າຍການເຊື່ອມໂຍງເຊື່ອມຈອດທາງລາງ  ຕະຫລອດເຖິງການຮ່ວມມືໃນການຜັກດັນການຄ້າ-ການຂົນສົ່ງຂ້າມແດນລະຫວ່າງ ສປປ ລາວ ກໍຄື ທ່າບົກທ່ານາແລ້ງ ແລະ ສປ ຈີນ, ທ່າບົກສາກົນ ອານໜິງ ແລະ ບໍລິສັດ ຜູ້ຜະລິດ ແລະ ສົ່ງອອກ ອັນດັບ 3 ຂອງ ຍານພະຫະນະ ແຂວງຢູນນານ ສປ ຈີນ

ໃນໂອກາດດຽວກັນ ກໍໄດ້ມີການເຊັນສັນຍາຮ່ວມມື ລະຫວ່າງ ບໍລິສັດ ທ່າບົກ ທ່ານາແລ້ງ ຈຳກັດຜູ້ດຽວ ແລະ ກຸ່ມບໍລິສັດ ທ່າບົກອ່ານໜິງ ຮູ້ນສ່ວນສາກົນ ຈຳກັດ. ຈຸດປະສົງ ການຮ່ວມມືດັ່ງກ່າວ ບໍ່ຈໍາກັດພຽງແຕ່ການຮ່ວມມືທ່າບົກກັບທ່າບົກ ແລະ ເຂດກັບເຂດ ແຕ່ເພື່ອນໍາໃຊ້ຂໍ້ໄດ້ປຽບດ້ານພູມມີສາດຂອງທ່າບົກທ່ານາແລ້ງ ເປັນຈຸດສຸມການເຊື່ອມຕໍ່ອາຊີດ້ານການຂົນສົ່ງ, ການຝາກສາງ, ການແລກປ່ຽນຂໍ້ມູນ, ການນຳໃຊ້ເອກະສານຮ່ວມກັນ. ພ້ອມກັນນັ້ນ ທ່າບົກອ່ານໜິງ ຍັງເປັນຈຸດຕັດກັນຂອງເສັ້ນທາງລົດໄຟ ລາວ-ຈີນ, ຈີນ-ຫວຽດ ແລະ ຈີນ-ມຽນມາ 3 ເສັ້ນທາງ. ຈຸດພິເສດດັ່ງກ່າວເຮັດໃຫ້ເປັນຈຸດສຸມຂອງການຂົນສົ່ງລະດັບຊາດຂອງຈີນ ເຊິ່ງຊ່ວຍໃຫ້ທ່າບົກທ່ານາແລ້ງ ຂະຫຍາຍການບໍລິການໄດ້ຫຼາຍດ້ານ.

ນອກຈາກເຊັນສັນຍາກັບ ທ່າບົກ ອ່ານໜິງແລ້ວ, ບໍລິສັດ ທ່າບົກ ທ່ານາແລ້ງ ຈຳກັດຜູ້ດຽວ ກໍໄດ້ເຊັນສັນຍາ ກັບ ບໍລິສັດ Lao financial Holding Sole.,LTD ແລະ ບໍລິສັດ China Intelligent Electric Vehicles Co., Ltd &Yunnan Maimiao Automobile Service Co., Ltd ຈຸດປະສົງຂອງການເຊັນສັນຍາແມ່ນ ສະໜັບສະໜູນ ສົ່ງເສິມເຊິ່ງກັນ ແລະ ກັນ, ບັນລຸການຮ່ວມມືໃນແບບຕ່າງຝ່າຍຕ່າງໄດ້ຮັບຜົນສຳເລັດ, ທັງສາມຝ່າຍມີເຈດຕະນານຳໃຊ້ລະບົບສາງພາງຂອງທ່າບົກທ່ານາແລ້ງ ຂອງ ສປປ ລາວ ເປັນການບໍລິການຫຼັກ ເພື່ອຮ່ວມກັນສ້າງເວທີການບໍລິການ ສິນຄ້າຂ້າມແດນ ແລະ ການບໍລິການທາງດ້ານແຫຼ່ງທຶນແບບປະສົມປະສານ “ການນຳເຂົ້າສິນຄ້າກ່ອນການເສຍພາສີອາກອນ + ການບໍລິການສາງພາງ + ການຂາຍກ່ອນຊຳລະພັນທະພາສີອາກອນ + ການຂາຍໃນຮູບແບບມີວົງເງິນກູ້ ການບໍລິການຫຼັງການຂາຍ” ເພື່ອຊ່ວຍຍົກລະດັບອຸດສາຫະກຳຍານພາຫະນະຂອງລາວ ແລະ ການພັດທະນາການຄ້າຂ້າມແດນໃນພາກພື້ນ.

ງານວາງສະແດງສິນຄ້າຄັ້ງນີ້ຈັດຂຶ້ນເປັນເວລາ 6 ວັນ ເຊິ່ງມີບັນດາຫົວໜ່ວຍທຸລະກິດຕ່າງໆໄດ້ນໍາເອົາສິນຄ້າຂອງຕົນເຂົ້າຮ່ວມວາງສະແດງພາຍໃນງານຫຼາຍກວ່າ 2.000 ບູດ ແລະ ງານຄັ້ງນີ້ກໍຖືເປັນໂອກາດດີສຳລັບທຸລະກິດໃນລາວເຮົາເພື່ອຊອກຫາຊ່ອງທາງ ແລະ ຄູ່ຮ່ວມມືການຄ້າກັບພາກທຸລະກິດຂອງຕ່າງປະເທດ ໂດຍສະເພາະພາກທຸລະກິດຈີນ ແລະ ອາຊີອາຕາເວັນອອກສຽງໃຕ້ ຖືໂອກາດເປີດກວ້າງໃຫ້ນັກທຸລະກິດທົ່ວພາກພື້ນຊາບວ່າ ການບໍລິການດ້ານໂລຊິດສະຕິກຜ່ານລາວນັ້ນແມ່ນໃຊ້ເສັ້ນທາງການຂົນສົ່ງທີ່ໃຊ້ຕົ້ນທຶນຕ່ຳຄືນັບຕັ້ງແຕ່ລົດໄຟລາວ-ຈີນ ເຊິ່ງຈະມາເຊື່ອມຕໍ່ກັບລົດ ໄຟລາວ-ໄທທີ່ທ່ານາແລ້ງ ເລີ່ມເປີດໃຫ້ບໍລິການເດືອນທັນວາ 2021 ຜູ້ນຳເຂົ້າ ແລະ ສົ່ງອອກສິນຄ້າໄດ້ຮັບປະ ໂຫຍດຈາກຕົ້ນທຶນດ້ານໂລຊິດສະຕິກທີ່ຫຼຸດລົງຫຼາຍ